Яраслаў Раманчук аб зніжэнні заробкаў: у 2022 годзе тэндэнцыя можа набыць сур'ёзны абарот

Падзенне заработнай платы ў Беларусі ўяўляе сабой сур'ёзную тэндэнцыю, і яна абвострыцца ў 2022 годзе. Такое меркаванне выказаў БелаПАН эканаміст Яраслаў Раманчук.

romanchuk_online_0912_05.jpg

Сярэдняя зарплата ў рэспубліцы падае другі месяц запар. Паводле звестак Белстата, у верасні 2021 года ў параўнанні са жніўнем яна знізілася на 20,5 рубля, або на 1,4%, і склала 1442,7 рубля. Такім чынам, сярэдняя зарплата склала 593,7 долара ў эквіваленце.

Як лічыць Раманчук, для таго каб зарплата расла, неабходна больш грошай, інвестыцый, новых працоўных месцаў, прадпрымальніцкай актыўнасці.

«Беларусь ідзе проста процілеглым шляхам. Больш за тое, санкцыі не пачалі практычна працаваць, самае галоўнае пачнецца ў 2022 годзе. Таму тое, што мы бачым па заробках, — гэта тэндэнцыя, якая можа набыць дастаткова сур'ёзны абарот», — сказаў эканаміст.

Пры гэтым беларускія прадпрыемствы «застаюцца ў зоне вельмі неэфектыўнага кіравання», мяркуе Раманчук.