Маскоўскі суд пакінуў у сіле рашэнне аб экстрадыцыі беларуса Вадзіма Дубойскага

Маскоўскі суд (першы апеляцыйны суд агульнай юрысдыкцыі) пакінуў у сіле рашэнне аб экстрадыцыі беларуса Вадзіма Дубойскага, паведамляе «Медыязона». Аднак напярэдадні Еўрапейскі суд па правах чалавека забараніў Расіі выдаваць яго ў Беларусь. Справа мусіць быць разгледжана ў Страсбургу.

31-гадовы Вадзім Дубойскі з Брэста. У жніўні 2020-га яго затрымалі і збілі сілавікі, пратакол не складалі. На волі мужчына зняў пабоі. Пасля гэтага на яго распачалі крымінальную справу аб удзеле ў «масавых беспарадках», яму пагражае да 8 гадоў пазбаўлення волі. Год таму Вадзім Дубойскі з'ехаў у Расію. Але праз паўгода яго там затрымалі па запыце з Беларусі. Беларус няўдала спрабаваў перабрацца ва Украіну. Рашэнне аб экстрадыцыі ў пачатку верасня 2021 года прыняў Белгарадскі раённы суд.

Калі б не адвакат, Дубойскі ўжо быў бы ў беларускай турме. У верасні расіяне пачалі заўчасную яго экстрадыцыю — перавялі з Белгарада ў Курск. Адвакат яго знайшоў і дамогся вяртання.
Паводле «Еўрарадыё».