Святар: У Беларусі толькі 1% праваслаўных

73 % беларусаў называюць сябе праваслаўнымі хрысціянамі, 12% ― католікамі, але пры гэтым кажуць, што вераць у Бога менш за 60% жыхароў

shra.jpg

Размаўляючы 28 верасня з чальцамі Рады біскупскіх канферэнцый Еўропы, Аляксандр Лукашэнка прапанаваў арганізаваць у Мінску спатканне Папы Рымскага і патрыярха Кірыла.

Безумоўна, гэта стала б гучнай падзеяй. Але больш значнай у палітычным плане ці рэлігійным?

Паводле сёлетняга апытання цэнтру «Pewresearch», 73 % беларусаў называюць сябе праваслаўнымі хрысціянамі, а 12% ― католікамі, але пры гэтым кажуць, што вераць у Бога менш за 60% жыхароў нашай краіны.

Святар Беларускай праваслаўнай царквы Аляксандр Шрамко наагул заяўляе, што ў Беларусі сапраўды праваслаўнымі можна лічыць не больш за 1% насельніцтва.

«Часта чалавек раз на год ідзе да царквы — асвяціць куліч на Вялікдзень. Нават у храм не заходзіць. Іншая справа — калі чалавек як хрысціянін кожную нядзелю абавязкова ходзіць у храм. І калі так прыкінуць, то ў нашых храмах больш за 1% фізічна не змесціцца. Насамрэч храмаў вельмі мала», — кажа святар.

Праз невялікі адсотак сапраўдных вернікаў царква не можа несці вялікую адказнасць за тое, што адбываецца ў краіне, зазначае ён. Але ж за дзеянні святароў, якія спрыяюць, напрыклад, завабліванню падлеткаў у шавіністычныя лагеры, — нясе.

У «Размове дня» з Уладзімірам Мацкевічам Аляксандр Шрамко таксама разважае пра тое, што «царква не павінна бяздумна падпяваць дзяржаве», і расказвае пра забарону прадаваць чарнасоценскую літаратуру ў праваслаўных крамах.


belsat.eu