Больш за дзясятак чалавек акупавалі будынак Еўрапейскай камісіі
Яны пратэставалі супраць фінансавання Еўрасаюзам даследаванняў збройнай прамысловасці.
Фота PAP/EPA/OLIVIER HOSLET
Больш за дзясятак чалавек акупавалі ў
Брусэлі адзін з будынкаў Еўрапейскай камісіі. Яны пратэставалі супраць
фінансавання Еўрасаюзам даследаванняў збройнай прамысловасці. У сітуацыю была
вымушаная ўмяшацца паліцыя.
За два дні да пачатку саміту NATO ў Брусэлі больш за дзясятак актывістаў арганізацый, якія папулярызуюць мір у свеце, разбілі лагер у фае будынку, дзе працуюць чыноўнікі, адказныя, між іншым, за падтрымку еўрапейскіх фірм па вытворчасці зброі. Актывісты пераконвалі, што ў часе канфлікту на Блізкім Усходзе ЕС не павінен падтрымліваць прамысловасць, якая «экспартуе смерць і канфлікт».
Адзін з арганізатараў пратэсту Брам Вранкен гаварыў, што пачатковая сума фінансавання з бюджэту ЕС фірм, якія выпускаюць зброю, гэта 90 мільёнаў еўра. Актывісты прынеслі з сабой намёты, але яны ім не спатрэбіліся. Пасля трох гадзін пратэсту паліцыя вывела актывістаў з будынку сілай.
Арганізацыі па папулярызацыі міру на зямлі заяўляюць пра чарговыя пратэсты заўтра, калі ў сталіцы Бельгіі прыляціць прэзідэнт ЗША Дональд Трамп.